La Kataluna Esperanto-Junularo invitas vin al sia junulara Esperanto-aranĝo, de la 20-a ĝis la 23-a de februaro 2025 en Olot (Katalunio)! RenKEJtiĝo estas plurtaga aranĝo por junaj esperantistoj kaj de Katalunio kaj de ĉie. Ni kuraĝigas vin partopreni kaj ĝui bonegan etoson kune!

IEJ anoncis la lokon de la 48-a Internacia Junulara Festivalo. Ĝi okazos dum la sekvajara Paska semajno en Torricella di Magione (PG), ĉe la mojosa Lago Trasimeno 🏊‍♂️, de la 17-a ĝis la 22-a de aprilo 2025. La belega regiono Umbrio kaj ĝiaj spirhaltigaj pejzaĝoj atendas vin ĉiujn, kun programo plenplena je atelieroj, vizitoj, ekskursoj kaj aliaj aktivaĵoj 🐣.

♈ Emociaj defioj povus aperi en via vivo ĉi-monate. Ĉu vi esprimu viajn sentojn en poemo laŭ Zamenhof-stilo? En la laborejo, estu pli lerta kaj atenta, ne kiel komencanto kiu ĵus lernis kiel uzi la akuzativon. Recepto por paco: malstreĉiĝu kun kafopaŭzo!

♉ Rilatoj estos testataj, do portu la paciencon de homoj, kiuj lernis kiel uzi ĉiujn Esperantajn tabelvortojn. Viaj amikoj donos al vi subtenon, do ĉu vi konsideru fondi Esperantan kantgrupon?

♊ Novembro alportas harmonion en la hejma vivo. Ĉu vi pensis pri reorganizado de via biblioteko de lernolibroj? En profesio, komunikado kun kolegoj gravas, do eble diru al ili "Saluton salatojn!" en Esperanto.

♋ Nun estas la tempo por spirita kaj emocia kresko. Profundiĝu en viaj pensoj. En laboro, serĉu ekvilibron inter profesia vivo kaj via internacia esperantista vivstilo—kaj ne forgesu la potencon de malstreĉaj konversacioj ĉe la Finna Benko.

♌ Atentu viajn revojn kaj ambiciojn! Vi eble pensas pri fondo de nova klubeto aŭ festo de la esperantista tago. Memoru, tamen, ke via vojo ne ĉiam bezonas brilajn paroladojn en ses lingvoj. Ĉi-monate: provu nur esti klara :)

♍ Novaj projektoj atendas vin, do eble venis la tempo lerni alian planitan lingvon. Atentu tamen: klarigu viajn pensojn kaj evitu tro detalajn analizojn pri gramatikaj diskutoj.

♎ Vi sentos inspiron por plivastigi viajn interrilatojn. Novembro donas ŝancon ligi novajn esperantistajn amikecojn kaj eĉ enkonduki ilin al via “ŝatata” prelego (Ĉu en KAEST?). Eble ne ĉiuj volas tiel profundan prelegon, do provu trovi ekvilibron inter amikeco kaj lingva pasio.

♏ Kun la suno ĉe vi, viaj emocioj estos intensaj kiel plena Esperanto-kurso en unu semajno. Ĉe la laboro, evitu perdi ekvilibron—serĉu silentan spacon por traduki Esperantajn proverbojn. Ne forgesu, ke via interna trankvileco, kiel ĉiu esperantista radikvorto, havas potencon preter via kompreno.

♐ Ĉi-monate vi renkontos novajn ŝancojn. Profesia progreso postulas paciencon, kiel kiam oni lernas pri kiel uzi “po” en Esperanto. Ripozu kaj ĝuu la simplajn aferojn, kiel la konjugacio de verboj en Esperanto.

♑ Novembro invitas vin konsideri longdaŭrajn celojn. Eble vi pensas pri organizado de kongreso? Inspiraj energioj alportas la decidemon, kiun vi bezonas por fari gravajn paŝojn. Memoru: ĉio bonas en sia tempo, kaj ankaŭ via projekto ne bezonas esti perfekta... almenaŭ ne tuj.

♒ Vi sentos plian ambicion kaj ricevos novan energion por malfermi projektojn. Atentu, tamen, la gravecon de paŭzoj: post bona sesio de komunikado eĉ la plej lertaj esperantistoj bezonas kafon kaj kabej de siaj respondecoj de tempo al tempo. Ekvilibrigante laboron kaj ripozon, vi faros grandajn atingojn.

♓ Novembro donas la ŝancon permesi al viaj emocioj flui kaj esplori novajn teritoriojn. Ĉesu loĝi en la pasinteco: 1887 estas for. Akceptu la novon kaj trovu pacon en moderna mondo. Jes, vi pravas, la mondo troviĝas ĉe la rando de klimata kolapso, kie la glaciejoj fandiĝas kiel glaciaĵaj likvaĵoj en la suno, kaj la oceanaj akvoj leviĝas por minaci niajn urbojn; kapitalismo, senkonscia pri la konsekvencoj, kondukas nin al formorto, forlasante arbarojn por iĝi sterilejoj kaj vivante en urboj de betono. Samtempe, militoj plimultiĝas, detruante komunumojn kaj disvastigante suferon, kun homoj fuĝantaj de siaj hejmoj, serĉante sekurecon en teritorioj, kiuj ankaŭ estas sub atako. SED NE ZORGU, vi estas pli forta! Ĉio estas en viaj naĝiloj, Fiŝo! Kuraĝon!